Entrevista Lucille Berry-Haseth

Gepubliceerd op 30 maart 2016

Lucille Berry-Haseth no ta un hende deskonosí na Kòrsou. Manera e mes ta bisa: ‘Mi ta sinti mi bendishoná ku e isla akí a duna mi e oportunidat pa desaroyá mi mes i ku mi por duna bèk tambe na mi isla.’ Na añanan sinkuenta el a traha komo lokutor general na Curaçaose Radio Omroep. El a traha tambe 27 aña komo dosente. Su dedikashon di mas grandi ta keda tòg Papiamentu, e lenga den kua el a skirbi, tradusí i presta hopi. ‘Kiko ta loke mas satisfakshon a duna mi? E honor di por a tradusí Dubbel Spel, e buki di Frank Martinus Arion, i mi mayor orguyo ta e prestigioso premio Cola Debrot ku mi a risibí pa mi kontribushon na literatura papiamentu’, segun Lucille.

Awe mi ta masha kontentu ku kasi 160 aña despues nos ta bai haña un hòspital nobo i esei mi ke ekspresá di e siguiente forma.

Nos Hòspital Nobo

Kòrsou di mi,

b’a dunami tantu!

Enseñansa, trabou, pan,

amigu pa yena mi ku amor,

bunitesa den hende i paisahe

pa inspirá poesia serka mi.

Bo lenga Papiamentu

a brasa mi di tal moda,

ku m’a dediká mi n’e

ku alma i kurpa.

Tòg mi isla stimá,

lo bo no ta kompleto

si seguridat i kuido

hasi bo yunan falta.

Na ora di malu

mi no ke sinti duda

den mi anhelo eterno

di buska amparo den bo brasa.

Nos hòspital nobo

ta duna mi speransa ku,

di spesialista te sirbidó,

rondoná pa luho i splendor

nan lo duna ku dedikashon renobá,

kuido ku amor na mi próhimo

i na mi mes, pa zoyando suave

den bo brasa nos por kura

i grita ku alegria

Kòrsou mi dushi, aki mi ke ta.