Entrevista Nadine Joubert - Manager interino HNO

Gepubliceerd op 30 maart 2016

“Mi nòmber ta Nadine Joubert, manager interino di proyekto di Hospital Nobo Otrobanda (HNO). Ami tin 2 aña trahando riba e proyekto di HNO. Promé ku esaki mi tabata traha pa Berenschot na Hulanda, pero mi a disidí di bin bek Kòrsou pa mi por kontribuí na e desaroyo di mi isla. Ta un honor pa por forma parti di e tim ku ta traha na un proyekto asina importante pa Kòrsou.

Parti di mi tarea ta pa sòru ku e personal di SEHOS por funshoná optimal den e hòspital nobo asina ku – ku un edifisio nobo, ekipo nobo, i training adishonal etc. e kalidat di servisio por mehorá. Ami ta kere den invertí den konosementu i abilidat di nos hendenan. Nan esfuerso den kombinashon ku e fasilidatnan nobo lo resultá den un kuido pagabel i di mihó kalidat pa henter nos komunidat.

E impakto di HNO lo bai mas leu ku su propio murayanan. Henter e sektor di kuido na Kòrsou lo mehorá pa motibu ku awor nos tin e oportunidat pa organisá nos prosesonan mas efisiente. Pa logra esaki tur e organisashonnan na Kòrsou den e sektor di kuido mester kolaborá ku otro. Nos meta komun ta: un kuido pagabel di e mihó kalidat posibel pa kada yu di Kòrsou.”