Hòspital Nobo Otrobanda ta haña bishita di su bisiñanan

Willemstad – Djamars i djárason último e studiantenan di grupo 3 i 4 di e sektor tékniko di St. Jozef VSBO a haña un rekorido riba e sitio di konstrukshon di Hospital Nobo Otrobanda (HNO). USONA, e organisashon enkargá ku realisashon di nos hòspital nobo a organisá e rekorido pa e studiantenan. Bou di guia e hóbennan a haña un impreshon di kon e hòspital lo keda. St. Jozef VSBO ta keda pegá ku e hòspital nobo.

Bou di guia di arkitekto Lyongo Juliana, i e Area Manager di HNO Dito Garmers i algun dosente, 5 grupo di en total 73 studiante a bishitá e sitio di konstrukshon di Hospital Nobo Otrobanda. E studiantenan a haña un rekorido riba un ruta pre stipulá kaminda nan a haña splikashon tokante di e trabounan ku ta keda hasí den e diferente fasenan di konstrukshon.

Dito Garmers, un di e personanan ku a duna e rekorido tabata hopi kontentu ku e entusiasmo di e studiantenan: “E promé parti di “ruwbouw” ta kla i awó bo por haña un bon bista di loke ta bai bin. Bo ta ripará ku e studiantenan di sektor tékniko tin un otro bista riba e hòspital. E preguntanan ku a bin dilanti no ta e preguntanan komun manera “ Ki dia e hòspital ta keda kla?” Al kontrario, nos a haña hopi pregunta tokante material i interior di e hòspital, por ehèmpel kua  kalidat di  betòn a keda utilisá, i tambe kon e salanan di operashon ta bai ta”.

Arkitekto Lyongo Juliana tambe a keda impreshoná ku e studiantenan. “Pa studiantenan di e sektor tékniko e tipo di rekoridonan aki ta èkstra interesante. Loke nan ta siña na skol, akinan nan por mira den praktiká” USONA ta enkargá ku konstrukshon di e hòspital nobo i nan tarea prinsipal ta pa pèrkurá ku tur kos ta kana bon, na tempu i den e budget stipulá. Den futuro serkano USONA lo kuminsá ofresé rekoridonan pa públiko regularmente.