Transishon

E proyekto HNO ta konsistí di diferente parti, entre otro transishon. Transishon ta e proseso di diseño di e organisashon di un hòspital nobo, e kolaborashon i sinkronisashon ku e ambiente i e traspaso di e empleadonan pa HNO. Riba e página aki ta splika kiko e transishon pa Hòspital Nobo Otrobanda ta enserá dor di kontestá algun preguntanan habrí.

Ken?

Tur tres partido Gobièrnu, USONA i SEHOS ta hunga un ròl importante den e transishon. USONA i SEHOS tin representashon den e tim di maneho di transishon i tur tres partido ta apuntá un of mas lider pa e diferente proyektonan òf kolaborador di proyekto pa e transishon. E tres partidonan  konhuntamente ta hasi tantu e parti di maneho komo esun operashonal di e transishon. Gobièrnu tin un ròl importante  den realisashon di e kondishonnan di transishon.  Ku Gobièrnu ke men e diferente ministerionan. E Ministerio di Salubridat, Medio Ambiente i Naturalesa (GMN) ta hunga un ròl prinsipal den esaki.  Tambe e otro partidonan, manera e sektor di kuido, organisashon di pashènt, SVB, sindikato i otronan ta importante de e trayekto di transishon.

Kiko?

E transishon ta konsistí di tres parti:
1) Diseño di e organisashon.
2) Kolaborashon i sinkronisashon ku e ambiente (prinsipalmente e otro organisashonnan di kuido).
3) Ekipá e empleadonan.

Dikon?

HNO ta bira un organisashon kompletamente nobo. Tur empleado di SEHOS ta pasa pa HNO. E transishon ta enserá e diseño di e organisashon nobo di e hòspital. Banda di esaki ta pertenesé tambe training i kurso pa tur hende. Ta invertí tambe den e kolaborashon i sinkronisashon ku e otro organisashonnan den kuido, tantu e promé liña, e di dos liña komo e sektor di kuido. Aki e pashènt i su siguridat ta para sentral.

Kon?

E pashènt i su siguridat ta para sentral. Un aspekto importante durante e transishon ta kultura – desaroyo di komportashon i kambio. E tim di maneho ta hunga un ròl krusial. Komunikashon tambe ta esensial durante e transishon.

Pa ki temporada?

E liña prinsipal pa e planifiká transishon ta e planifikashon di konstrukshon di HNO. Den kareda di 2018 HNO lo bira kompletamente operashonal. A adaptá e planifikashon di e trayekto di transishon na esaki; e transishon na HNO a start medio 2015 i lo kontinuá te ku algun luna despues ku inougurá e hòspital.

Unda?

Pa ehekutá e trayekto di transishon ku éksito a reservá un lugá kaminda e kultura nobo di HNO lo ta visibel, kaminda parsialmente e parti físiko di HNO ta keda simulá, kaminda e transishon ta haña realse: e “House of Change”.

Den e House of Change ta traha parti di HNO, di moda ku e empleadonan ku ta bin traha i hende ku ta interesá pa sa mas di HNO , por ehèmpel pashènt i bishitantenan di e hòspital, por eksperensiá e práktika.

E training i kursonan ta tuma lugá den e  House of Change.

Di e forma aki e empleadonan ta sali for di nan situashon aktual di trabou diario i nan por dirigí nan mes kompletamente riba HNO i nan situashon nobo. Di e forma aki nan por imaginá nan mes mihó i eksperensiá kon e situashon nobo lo bira, ku ta hasi e efekto di training i kurso mas grandi. Lo establesé e House of Change den e ala nort di Colon na Otrobanda. Esaki ta alkansabel na pia for di SEHOS i tin bista riba e tereno di konstrukshon di HNO.